O‘zbekistonda milliy sertifikat tizimi kengaytiriladi. 2026-yil 1-sentabrdan boshlab yana 11 ta xorijiy til bo‘yicha ko‘p darajali milliy sertifikat testlari yo‘lga qo‘yiladi.
Bu Vazirlar Mahkamasining 2026-yil 29-iyuldagi “Milliy sertifikat berish tizimini yanada takomillashtirish chora-tadbirlari to‘g‘risida”gi 411-son qarorida belgilangan. Qaror 30-iyuldan kuchga kirgan.
Qaysi tillar milliy sertifikat tizimiga qo‘shiladi?
Yangi tartib quyidagi xorijiy tillarni qamrab oladi:
- xitoy tili;
- koreys tili;
- yapon tili;
- ispan tili;
- italyan tili;
- fors tili;
- dari tili;
- pushtu tili;
- urdu tili;
- hindiy tili;
- uyg‘ur tili.
Mazkur tillar bo‘yicha ko‘p darajali — Multi-level formatdagi test tizimi 2026-yil 1-sentabrdan amaliyotga tatbiq etiladi.
Huquqshunoslikdan ham milliy sertifikat beriladi
Qaror bilan 2026/2027-o‘quv yilidan huquqshunoslik fanini bilish darajasini baholash va milliy sertifikat berish tizimini joriy etish belgilandi.
Huquqshunoslik bo‘yicha test topshiriqlari quyidagi manbalar asosida shakllantiriladi:
- umumiy o‘rta ta’lim o‘quv dasturlari;
- O‘zbekiston Respublikasi Konstitutsiyasi;
- amaldagi qonunchilik hujjatlari.
Demak, talabgorlardan maktab dasturidagi huquqiy bilimlar bilan bir qatorda, Konstitutsiya va amaldagi qonunchilik mazmunini tushunish ham talab qilinadi.
Imtihon sanalari qayerda e’lon qilinadi?
Milliy sertifikat imtihonlari o‘tkaziladigan sana va manzillar oldindan:
- Bilim va malakalarni baholash agentligining rasmiy sayti;
- Yagona interaktiv davlat xizmatlari portali — my.gov.uz
orqali e’lon qilib boriladi.
Talabgorlar imtihon jadvali, ro‘yxatdan o‘tish muddatlari va mavjud o‘rinlar haqidagi ma’lumotlarni ushbu rasmiy platformalar orqali kuzatishi kerak.
