Milliy sertifikat imtihonlariga ro‘yxatdan o‘tish tartibi o‘zgardi. Endilikda talabgorlar har bir hudud uchun oldindan ajratilgan o‘rinlar soni doirasida ro‘yxatdan o‘tkaziladi.

Shu sababli ariza topshirishning umumiy muddati tugamagan bo‘lsa ham, ma’lum bir hududdagi joylar to‘lib qolsa, o‘sha hudud bo‘yicha ro‘yxatdan o‘tish yopilishi mumkin.

Yangi tartib Vazirlar Mahkamasining 2026-yil 29-iyuldagi 411-son qarori asosida joriy etilgan.

Hududlar bo‘yicha o‘rinlar oldindan belgilanadi

Bilim va malakalarni baholash agentligi:

• test o‘tkaziladigan joyni;
• imtihon sanasini;
• har bir hudud uchun ajratiladigan o‘rinlar sonini

oldindan belgilaydi.

Ushbu ma’lumotlar Agentlikning rasmiy veb-sayti va Yagona interaktiv davlat xizmatlari portali orqali e’lon qilinadi.

Talabgorlar esa hududda mavjud bo‘sh o‘rinlar doirasida ro‘yxatdan o‘tadi.

Ro‘yxatdan o‘tishni oxirgi kunga qoldirish xavfli

Masalan, muayyan viloyat uchun ajratilgan barcha joylar talabgorlar bilan to‘lsa, rasmiy ariza topshirish muddati hali tugamagan bo‘lsa ham shu hududni tanlash imkoniyati yopiladi.

Shu sababli milliy sertifikat olishni rejalashtirayotgan talabgorlarga arizani imkon qadar ertaroq topshirish tavsiya etildi.

2026-yil oxirigacha qariyb 500 mingta o‘rin ajratildi

2026-yil sentabr–dekabr oylaridagi milliy sertifikat imtihonlari uchun jami 496 303 ta o‘rin ajratilgan.

Oylar bo‘yicha:

• sentabr — 125 753 ta;
• oktabr — 129 535 ta;
• noyabr — 112 335 ta;
• dekabr — 128 680 ta.

Eng ko‘p o‘rin oktabr oyidagi imtihonlar uchun ajratilgan.

Imtihonlar soni ham oshdi

2026-yilning sentabr–dekabr oylarida:

• matematika;
• kimyo;
• geografiya;
• biologiya;
• fizika;
• ona tili va adabiyot;
• tarix

fanlaridan ikki martadan milliy sertifikat imtihoni o‘tkaziladi.

Huquqshunoslik fanidan esa bir marta imtihon tashkil etilishi rejalashtirilgan.

Shunday qilib, to‘rt oy davomida jami 15 ta milliy sertifikat imtihoni o‘tkaziladi.

Taqqoslash uchun, 2025-yilning shu davrida 11 ta imtihon o‘tkazilgan va ularda 255 217 nafar talabgor qatnashgan.

Yangi tartib nega joriy etildi?

Agentlik ma’lumotiga ko‘ra, hududlar kesimida o‘rinlar belgilanishi talabgorlar sonini sun’iy ravishda cheklash uchun emas.

Bu:

• mavjud imtihon binolaridan samarali foydalanish;
• texnik vositalar va xodimlar yuklamasini taqsimlash;
• nazoratni sifatli tashkil etish;
• natijalarni belgilangan muddatlarda e’lon qilish

uchun joriy etilgan.