Shu yil sentyabr oyida bo‘lib o‘tgan test sinovlarida omadi kelmagan Qoraqalpog‘istonning Mo‘ynoq, Taxtako‘pir va Qorao‘zak tumanlaridan topshirgan abituriyentlar o‘qishga qo‘shimcha qabul qilinadi.
Buning uchun abituriyent eng kamida 56,7 ball to‘plagan bo‘lishi kerak (maksimal 189 ballning 30 foizi) va tibbiyot yo‘nalishlaridan boshqa sohani tanlashi darkor. O‘qishga to‘lov-shartnoma asosida qabul qilinadi va o‘qishni tugatgandan keyin shu hududlarda kamida 5 yil ishlab berishi kerak.
Ertaga, 13 noyabrdan boshlab ushbu 3 ta tumanda 4 ta sektor rahbarlari hamda oliy o‘quv yurtlari vakillari ishtirokida yuqoridagi talablar asosida o‘qishga hoxish bildirgan abituriyentlar va ularning ota-onalari bilan uchrashuv tashkil qilinmoqda.
Mazkur tadbir Prezident Shavkat Mirziyoyevning 2020 yil 2 oktyabr kuni Qoraqalpog‘istonga safari davomida berilgan topshiriqning ijrosi doirasida amalga oshirilmoqda.
Imkoniyatdan mazkur tumanlarda doimiy yashaydigan abituriyentlar foydalana oladi va ular Qoraqalpog‘iston Respublikasida faoliyat yuritadigan (tibbiyot yo‘nalishlaridan boshqa) oliy o‘quv yurtlariga o‘qishga qabul qilinadi.
E.Qanoatov, O‘zA
