Bugun, 12 may kuni AOKAda davlat xususiy sheriklik shartlari asosida talabalar turar joylari qurilishi va unga ajratilayotgan subsidiya mablag‘lari yuzasidan OTV mutasaddilari ishtirokida matbuot anjumani tashkil qilindi.
Tadbirda Oliy va o‘rta maxsus ta’lim vaziri o‘rinbosari Sarvar Buzrukxonov jurnalistlarning DXSh asosida qurilayotgan talabalar turar joylarida to‘lov masalasi qanday bo‘lishi borasidagi savoliga ham javob qaytardi.
Unga ko‘ra, OTM tomonidan bugungi kunda talabadan qanday tartibda to‘lov undirilayotgan bo‘lsa, yangi yotoqxonalarda ham o‘sha narx saqlanib qoladi.
“Narxda o‘zgarish yo‘q. Shuning uchun biz kelishilgan narx deyapmiz. Talabalarga qo‘shimcha yuk tushmasligi uchun ham davlat budjetidan yetarli miqdorda subsidiya berilyapti.
Hech qaysi me’yorlar talaba to‘layotgan pul narxining oshishiga olib kelmaydi" – dedi Sarvarxon Buzrukxonov.
Ma’lumot uchun, O‘zbekistonda 2025 yilga qadar qo‘shimcha yana 228 ta talabalar turar joylari qurilishi rejalashtirilgan.
