2026/2027-o‘quv yili uchun oliy ta’lim muassasasiga talabalikka tavsiya etilgan abituriyentlar o‘qishni rasmiylashtirish uchun tegishli hujjatlarni OTMga topshirishi kerak.

Birinchi kursga qabul qilingan talabalardan odatda pasport, attestat yoki diplomning asl nusxasi, fotosuratlar va mavjud imtiyoz hujjatlari talab etiladi.

Qanday hujjatlar topshiriladi?

Talabalikka tavsiya etilganlardan quyidagi hujjatlar so‘raladi:

1. rektor nomiga ariza;

2. pasport nusxasi — asli ko‘rsatilgan holda;

3. attestat yoki diplomning ilovasi bilan birga asl nusxasi;

4. xorijiy tilni bilish darajasini tasdiqlovchi sertifikat asli — mavjud bo‘lsa;

5. 3,5 × 4,5 o‘lchamdagi 12 dona fotosurat;

6. hujjatlar yig‘ma jildi — papka-skorosshivatel;

7. A5 formatdagi konvert;

8. talabalar turar joyiga ehtiyoji mavjud talabalar uchun tegishli ariza va tasdiqlovchi hujjatlar;

9. imtiyoz asosida qabul qilingan talabalar uchun imtiyoz beruvchi hujjatning asli — mavjud bo‘lsa.

Rektor nomiga ariza uchun tegishli namuna OTM tomonidan taqdim etiladi.

Hujjat topshirish uchun hozirdanoq OTMga borish kerakmi?

Yo‘q. Talabalikka tavsiya etilgan talabadan hujjatlarni topshirish uchun o‘qish boshlanishidan oldin alohida universitetga borish talab etilmaydi.

Talaba o‘qish boshlangach OTMga kelganida zarur hujjatlarni o‘zi bilan olib borib, belgilangan tartibda topshirishi mumkin.

Nodavlat OTMlarda tartib boshqacha bo‘lishi mumkin

Yuqoridagi hujjatlar ro‘yxati davlat OTMlaridagi odatiy tartibga taalluqli.

Nodavlat oliy ta’lim tashkilotlarida talab qilinadigan hujjatlar va ularni topshirish muddati farq qilishi mumkin. Shu sababli xususiy universitetga qabul qilingan talabalar o‘z OTMining rasmiy e’lonlarini tekshirishi yoki universitet bilan bevosita bog‘lanishi tavsiya etiladi.