Magistraturada o‘qiyotgan xotin-qizlar uchun kontrakt to‘lovlarini qoplash tartibi
Hukumatning 2022-yil 15-avgustdagi 447-son qaroriga muvofiq, davlat oliy ta’lim muassasalarida magistratura bosqichida tahsil olayotgan barcha xotin-qizlarning kontrakt to‘lovlari Davlat byudjeti mablag‘lari hisobidan qaytarilmas shartda qoplab beriladi.
Biroq bu imtiyozdan foydalanish uchun belgilangan tartib mavjud. Talabgor 15-sentabrga qadar o‘qiyotgan oliygohining rektori yoki filial direktori nomiga ariza bilan murojaat qilishi shart. Ushbu muddatdan o‘tib ketgan arizalar ko‘rib chiqilmaydi.
Tatbiq etilmaydigan holatlar
Mazkur imtiyoz quyidagi toifadagi to‘lovlarga nisbatan amal qilmaydi:
-
15-sentabrdan keyin topshirilgan arizalar;
-
tabaqalashtirilgan to‘lov-kontrakt summalari;
-
qo‘shma ta’lim dasturlari uchun to‘lovlar.
Jarayon qanday amalga oshiriladi?
-
Talabaning arizasi oliygoh tomonidan 3 ish kunida ko‘rib chiqiladi.
-
Shundan so‘ng kontrakt summasini qoplash bo‘yicha ro‘yxat shakllantiriladi.
-
Yakuniy qaror sifatida, 15-oktabrgacha oliygoh rektori yoki filial direktori tegishli buyruqni tasdiqlaydi.
Muhim eslatma
Arizani 15-sentabrga qadar topshirish shart! Shunda magistratura bosqichida o‘qiyotgan xotin-qizlarning kontrakt to‘lovlari davlat tomonidan to‘liq qoplab beriladi.
