O‘zbekistonda xorijiy tillarni o‘qituvchi xodimlarga qo‘yiladigan sertifikat talablarini kuchaytirish rejalashtirilmoqda. Jamoatchilik muhokamasiga qo‘yilgan Hukumat qarori loyihasiga ko‘ra, talab etiladigan xorijiy til sertifikatiga ega bo‘lmagan xodimlar bilan tuzilgan mehnat shartnomasini bekor qilish taklif etilgan.
Mazkur jarayon mehnat qonunchiligida belgilangan tartib asosida amalga oshirilishi nazarda tutilmoqda.
Qaysi qarorga o‘zgartirish kiritiladi?
Loyihada Vazirlar Mahkamasining 2021-yil 19-maydagi “Xorijiy tillarni o‘rganishni ommalashtirishni samarali tashkil etish chora-tadbirlari to‘g‘risida”gi 312-son qaroriga yangi norma kiritish ko‘zda tutilgan.
Taklifga muvofiq, muayyan lavozim uchun talab qilinadigan tegishli xorijiy til sertifikatini olmagan xodim bilan tuzilgan mehnat shartnomasi Mehnat kodeksi va boshqa qonunchilik hujjatlarida belgilangan tartibda bekor qilinishi mumkin.
Bu sertifikati yo‘q barcha xodimlar avtomatik ravishda ishdan bo‘shatiladi degani emas. Norma qabul qilinsa, uning tatbiqi xodim egallab turgan lavozim, sertifikatga qo‘yilgan talab va mehnat qonunchiligidagi tartiblarga bog‘liq bo‘ladi.
“Mehrli maktab”lar faoliyatiga ham o‘zgartirishlar kiritilishi mumkin
Qaror loyihasida uzoq muddat davolanayotgan bolalar uchun tashkil etilgan “Mehrli maktab”lar faoliyatiga oid normalarni ham takomillashtirish taklif qilingan.
Jumladan:
- namunaviy shtatlar jadvalini tasdiqlash;
- ayrim lavozimlarni qayta belgilash;
- xodimlarning mehnatiga haq to‘lash tartibiga aniqlik kiritish;
- muassasalar faoliyatini tashkil etishga doir ayrim qoidalarni yangilash
rejalashtirilmoqda.
Mazkur maktablar gematologiya, onkologiya, klinik immunologiya va boshqa kasalliklar sabab uzoq muddat davolanayotgan bolalarning ta’lim olishini davom ettirishga xizmat qiladi.
Ustama va mukofotlarni to‘lash tartibi qayta ko‘rib chiqiladi
Loyihada Maktabgacha va maktab ta’limi vazirining jamg‘armasi hisobidan amalga oshiriladigan to‘lovlar tartibini ham aniqlashtirish nazarda tutilgan.
Xususan, har oylik ustamalar va bir martalik mukofotlarni to‘lash muddatlarini belgilash taklif qilinmoqda.
Qaror loyihasi jamoatchilik muhokamasida. Undagi normalar yakuniy shaklda qabul qilingandan va rasmiy e’lon qilingandan keyingina kuchga kiradi.
