Muhim: abituriyentlarni onlayn ro‘yxatga olish muddatlari o‘zgardi


Vazirlar Mahkamasining 2022-yil 13-iyuldagi 1-son bayoniga muvofiq, 2022-2023-o‘quv yili qabulida abituriyentlarni onlayn ro‘yxatga olish muddatlari uzaytirildi.

Bu haqda Davlat test markazi xabar berdi.

Unga ko‘ra, 2022-2023-o‘quv yili qabulida abituriyentlarni onlayn ro‘yxatga olish 2022 yil 27 iyulga qadar (27-iyul kuni ham) davom etadi.

Chet tilidan kasbiy (ijodiy) imtihon o‘tkaziladigan bakalavriat ta’lim yo‘nalishlariga ro‘yxatga olish esa 17-iyulga qadar (17-iyul kuni ham) amalga oshiriladi.

Mazkur muddat davomida abituriyentlar o‘z ma’lumotlarini o‘zgartirishlari hamda chet tilidan milliy yoki xalqaro sertifikatga ega bo‘ladigan bo‘lsa, sertifikat ma’lumotlarini tizimga kiritishlari mumkin.

Eslatib o‘tamiz, abituriyentlarni onlayn ro‘yxatga olish 20-iyundan boshlangandi.