Normativ-huquqiy hujjatlar loyihalari muhokamasi portalida Vazirlar Mahkamasining “Toshkent arxitektura-qurilish instituti o‘quv, laboratoriya, yotoqxona binolari va ijtimoiy-muhandislik infratuzilmasi obektlarini qurish, rekonstruksiya qilishni amalga oshirish bo‘yicha qo‘shimcha chora-tadbirlari to‘g‘risida"gi qarori loyihasi joylashtirildi.
Hujjatda qayd etilishicha, Toshkent arxitektura-qurilish institutining bino va inshootlarini qurilishi, rekonstruksiya qilinishi va moddiy-texnika bazasini mustahkamlashda bir qator holatlar bo‘yicha kechiktirib bo‘lmaydigan yechimlarni kutmoqda, xususan:
birinchidan, hozirgi kunda mavjud 1650 o‘rinli o‘quv binolarda 4263 nafar talabalar to‘liq ikki smenada ta`lim olmoqda;
ikkinchidan, o‘quv-laboratoriyalari jihozlari va uskunalarini o‘rnatish joylari texnik topshiriq talablariga javob bermaydi;
uchinchidan, 250 o‘rinli talabalar turar joyi binosi ehtiyojni qoplamaydi;
to‘rtinchidan, sport inshootlari va maydonlari mavjud emas.
Hujjatda belgilanishicha, Toshkent arxitektura-qurilish institutiga berilgan Toshkent shahar, Yunusobod tumani, Yangi shahar ko‘chasi, 9 va 9a uy manzillari hududida mavjud bo‘lgan o‘quv, laboratoriya va yotoqxona binolarini rekonstruksiya qilish, sport inshooti va oshxona obektlarini qurish hamda jihozlash ishlari 2019 yil 1 sentabrga qadar tugatiladi.
O‘zbekiston Respublikasi Investitsiyalar bo‘yicha davlat qo‘mitasi, Moliya vazirligi, Qurilish vazirligi, Iqtisodiyot vazirligi Toshkent shahar hokimligi «Yagona buyurtmachi xizmati» injiniring kompaniyasining asoslangan hisob-kitoblari asosida:
O‘zbekiston Respublikasi Vazirlar Mahkamasi huzuridagi O‘zbekiston Respublikasining rivojlanish davlat dasturlarini moliyalashtirish jamg‘armasi mablag‘lari hisobidan Toshkent arxitektura-qurilish institutiga berilgan o‘quv, laboratoriya va yotoqxona binolarini rekonstruksiya qilish, sport inshooti va oshxona obektlarini qurish hamda jihozlash maqsadida 2018 yilda loyiha-smeta hujjatlarini ishlab chiqish va qurilish-montaj ishlarini boshlash uchun zarur mablag‘larni ajratish O‘zbekiston Respublikasi Prezidentining 2017 yil 20 apreldagi PQ-2909-qarori bilan 2018 yilda Toshkent arxitektura qurilish institutining sobiq Toshkent shahri, Mirzo Ulug‘bek tumani, Qorasuv-4 massivi, 11-uy manzili bo‘yicha joylashgan binolarni kapital ta`mirlash uchun ajratilgan 10 mlrd so‘m mablag‘ hisobidan ta`minlaydi.
2019 yil va keyingi yillar O‘zbekiston Respublikasi Investitsiya dasturini shakllantirishda Toshkent arxitektura-qurilish instituti obektlarini qurish va rekonstruksiya qilish hamda jihozlash uchun Jamg‘armadan mablag‘lar ajratilishini nazarda tutadi.
Bosh loyihachi tashkilot “Tashgiprogor" aksiyadorlik jamiyati tomonidan Toshkent arxitektura-qurilish institutining barcha o‘quv, laboratoriya, yotoqxona binolari va korpuslari, sport inshootlari va ijtimoiy-muhandislik infratuzilmasi obektlarini qurish, rekonstruksiya qilish va kapital ta`mirlashni loyihalashtirishda qo‘llaniladigan yagona texnik topshiriq hamda talablar bo‘yicha ishlab chiqilgan konsepsiyasi ma`qullanadi.
Toshkent shahar hokimligi «Yagona buyurtmachi xizmati» injiniring kompaniyasi Toshkent arxitektura-qurilish institutining ma`muriy va o‘quv binolari qurilishini shaharsozlik normalari va qoidalariga rioya etgan holda 2019-2020 yillarda tugallaydi.
O‘zbekiston Respublikasi Qurilish vazirligi ishlab chiqilayotgan loyiha-smeta hujjatlari, berilayotgan ekspert xulosalari va qurilish-montaj ishlarining bajarilishi sifati ustidan doimiy va tizimli nazoratni ta`minlaydi.
O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasi, Toshkent shahar hokimligi:
Toshkent shahri, Yunusobod tumani, Yangi shahar ko‘chasi, 9a-uy manzili bo‘yicha joylashgan “Rino Work Wear" MChJ binolari va tegishli hududi bilan birgalikda tezkor boshqarish huquqi bilan Toshkent arxitektura-qurilish institutiga;
“Rino Work Wear" MChJga Toshkent shahridan mos ravishda bino va yer maydoni ajratiladi.
Manba: kun.uz
