Ayrim oliy ta’lim tashkilotlari 2026/2027-o‘quv yili uchun tabaqalashtirilgan to‘lov-kontrakt — super-kontrakt miqdorlarini e’lon qila boshladi.
Jumladan, Termiz davlat universitetida super-kontrakt summasi bakalavriat ta’lim yo‘nalishiga qarab 29,6 million so‘mdan 90 million so‘mgacha etib belgilangan.
Super-kontrakt miqdorini endi kim belgilaydi?
2025-yil 13-sentyabrdagi 578-son qaror bilan ilgari ushbu masalalarni tartibga solgan 2017-yil 20-iyundagi 393-son qaror o‘z kuchini yo‘qotgan.
Amaldagi tartibga ko‘ra, qabul chegarasiga 4,05 balldan ortiq ball yetmagan abituriyentlar uchun super-kontrakt miqdorini OTM rektori yoki direktori belgilaydi.
Bunda tabaqalashtirilgan to‘lov-kontrakt summasi tegishli ta’lim yo‘nalishidagi bazaviy kontrakt miqdorining kamida 3 baravari bo‘lishi kerak.
Shu sababli bir xil yoki o‘xshash ta’lim yo‘nalishi bo‘yicha super-kontrakt miqdori turli universitetlarda har xil bo‘lishi mumkin.
Termiz davlat universitetida super-kontrakt qancha?
2026/2027-o‘quv yili uchun Termiz davlat universitetida e’lon qilingan summalar ta’lim yo‘nalishiga qarab farqlanadi.
Eng past miqdor ayrim yo‘nalishlarda 29,6 million so‘mdan boshlanadi.
Eng yuqori super-kontrakt esa quyidagi yo‘nalishlarda belgilangan:
-
Yurisprudensiya;
-
Xalqaro munosabatlar;
-
Davlat va jamiyat boshqaruvi.
Mazkur yo‘nalishlarda tabaqalashtirilgan kontrakt miqdori 90 million so‘mni tashkil etadi.
Barcha OTMlarda narx bir xil bo‘ladimi?
Yo‘q. Super-kontrakt miqdorini belgilash vakolati OTM rahbarlariga berilgani sababli universitetlar va ta’lim yo‘nalishlari kesimida summalar farq qilishi mumkin.
Shuning uchun abituriyent aynan o‘zi tanlagan OTMning rasmiy e’lonini tekshirishi kerak.
Super-kontrakt uchun ariza boshlandimi?
Hozircha yo‘q.
2026/2027-o‘quv yili uchun super-kontraktga ariza topshirish jarayoni hali boshlanmagan. Arizalar elektron shaklda qabul qilinishi rejalashtirilgan va buning uchun OTMga shaxsan borish talab etilmaydi.
Ariza topshirish muddati va elektron platforma bo‘yicha qo‘shimcha ma’lumotlar keyinchalik e’lon qilinadi.
