Davlat oliy ta’lim muassasalari o‘rtasida qishki o‘qishni ko‘chirish jarayoni 20 dekabrdan boshlanadi. Bu tartib faqat ikki turdagi uzrli sabablar asosida amalga oshiriladi va hujjatlar faqat oflayn, talaba yoki uning yaqin qarindoshi tomonidan shaxsan topshiriladi.
Ruxsat beriladigan uzrli sabablar:
-
Talaba oila qurgan bo‘lsa va turmush o‘rtog‘i doimiy yashaydigan hududdagi OTMga o‘qishni ko‘chirishni istasa.
-
Davlat organi xodimining ish joyi o‘zgarganda, uning turmush o‘rtog‘i yoki voyaga yetmagan farzandi o‘qishini ko‘chirmoqchi bo‘lsa. Bu holatda tegishli idora rahbarining tavsiya xati talab etiladi.
Arizalarni topshirish tartibi:
-
Murojaatlar 20 dekabrdan 20 yanvargacha qabul qilinadi.
-
Arizalar hududiy ishchi guruhlarga faqat oflayn tarzda topshiriladi.
-
Onlayn ariza topshirish imkoniyati mavjud emas.
Taqdim etilishi lozim bo‘lgan hujjatlar:
-
O‘qishni ko‘chirish bo‘yicha ariza (blankani ishchi guruh joyida taqdim etadi).
-
Reyting daftarchasi, akademik ma’lumotnoma yoki transkript nusxasi (birortasi yetarli).
-
Pasport nusxasi.
-
Uzrli sababni tasdiqlovchi tegishli hujjatlar.
Jarayonni boshqarish uchun har bir mas’ul OTMda ishchi guruhlar tuzilgan. O‘qishni ko‘chirish bilan bog‘liq barcha masalalar aynan shu guruhlar orqali ko‘rib chiqiladi.
