Xorijiy va nodavlat oliy ta’lim tashkilotlaridan davlat oliy ta’lim muassasalariga o‘qishni ko‘chirish bo‘yicha maxsus sinovlarning o‘tish ballari tasdiqlandi.

Oliy ta’lim, fan va innovatsiyalar vazirining tegishli buyrug‘iga asosan, 2026/2027-o‘quv yili uchun o‘qishni ko‘chirish jarayonida qo‘llaniladigan minimal ballar belgilandi.

Unga ko‘ra, xorijiy va nodavlat oliygohlarda tahsil olayotgan talabalar davlat oliy ta’lim muassasalariga o‘qishini ko‘chirish uchun tanlagan ta’lim sohasi yoki yo‘nalishi bo‘yicha belgilangan o‘tish balini to‘plashi kerak bo‘ladi.

Eng yuqori o‘tish bali huquq yo‘nalishi uchun 165 ball etib belgilandi. Bu mazkur yo‘nalishda raqobat yuqori bo‘lishi va talablar kuchaytirilganini ko‘rsatadi.

Shuningdek, siyosatshunoslik, xalqaro munosabatlar hamda jahon iqtisodiyoti va xalqaro iqtisodiy munosabatlar yo‘nalishlari uchun 140 balldan o‘tish bali belgilangan.

Sog‘liqni saqlash yo‘nalishida o‘qishni ko‘chirish uchun 132 ball talab etiladi.

San’at, ijtimoiy fanlar, jurnalistika, biznes va boshqaruv yo‘nalishlarida o‘tish bali 105 ballni tashkil qiladi.

Transport xizmatlari yo‘nalishi bo‘yicha 104 ball belgilangan.

Ta’lim, gumanitar fanlar, tillar, atrof-muhit, matematika va statistika, axborot-kommunikatsiya texnologiyalari hamda ijtimoiy ta’minot yo‘nalishlarida o‘tish bali 94 ball etib tasdiqlangan.

Biologik va turdosh fanlar, fizika va tabiiy fanlar hamda xizmat ko‘rsatish sohasi uchun 80 ball talab etiladi.

Muhandislik, ishlab chiqarish va ishlov berish, arxitektura va qurilish yo‘nalishlarida esa o‘tish bali 75 ball etib belgilangan.

Qishloq xo‘jaligi, o‘rmon xo‘jaligi, baliq xo‘jaligi hamda gigiyena va ishlab chiqarishda mehnat muhofazasi yo‘nalishlari uchun 70 ball talab qilinadi.

Eng past o‘tish bali veterinariya yo‘nalishi uchun belgilangan bo‘lib, ushbu yo‘nalishda o‘qishni ko‘chirish uchun 60 ball yetarli bo‘ladi.

Muhim jihati, xorijiy davlatlarning oliy ta’lim tashkilotlaridan O‘zbekiston davlat oliy ta’lim muassasalarining mos yoki turdosh bo‘lmagan bakalavriat ta’lim yo‘nalishlariga o‘qishni ko‘chirishga ruxsat etilmaydi.

Shu sababli o‘qishini ko‘chirmoqchi bo‘lgan talabalar avvalo o‘z yo‘nalishi mos yoki turdosh ekanini, so‘ngra tegishli o‘tish balini diqqat bilan tekshirishi lozim.