Nogironligi bo‘lgan shaxslarga beriladigan imtiyozlar


Prezidentning PF-5270-son farmoniga muvofiq Vazirlar Mahkamasining 417-son qarori qabul qilingan. Unga muvofiq:

Bunday shaxslar qo‘shimcha davlat granti kvotasi asosida qabul qilinadilar. Ularga maktabning 11-sinfini yoxud akademik litsey yoki kasb-hunar kollejini tugatganligi haqidagi hujjatga, shuningdek I va II guruh nogironligi to‘g‘risidagi maʼlumotnomaga ega nogironlar, shuningdek nogiron bolalar daʼvogarlik qilishi mumkin.

Ular hujjatlarni maxsus qabul komissiyasiga topshiradilar, uning tarkibiga oliy taʼlim muassasalari, Sog‘liqni saqlash vazirligining hududiy boshqarmasi vakillari kiradi, O‘zbekiston Nogironlar jamiyati vakillari ham kirishi mumkin. Uning o‘zi nogironligi bo‘lgan shaxslar bilan kasbga yo‘naltirish bo‘yicha suhbatlar o‘tkazadi. Hujjatlarning umumiy paketiga qo‘shimcha ravishda abituriyentning nogironligini tasdiqlovchi hujjatning nusxasini ilova qilish va uning aslini ko‘rsatish lozim.

Bunday abituriyentlar to‘g‘risidagi barcha axborot Davlat test markazining maʼlumotlar bazasiga kiritiladi. So‘ngra maʼlumotlar Sog‘liqni saqlash vazirligiga taqdim etiladi, u mazkur axborotni o‘rganib chiqadi. Abituriyentning nogironligi tasdiqlanmasa, u qo‘shimcha kvota bo‘yicha imtihonlarga qo‘yilmaydi.

Test sinovlari va kasbiy (ijodiy) imtihonlar o‘tkaziladigan barcha binolarda nogironligi bo‘lgan shaxslar uchun zarur shart-sharoitlar yaratiladi. To‘plash mumkin bo‘lgan eng yuqori ballning 30%idan kam bo‘lmagan ball to‘plaganlar ballar ketma-ketligiga qatʼiy rioya etilgan holda qo‘shimcha kvota doirasida talabalikka tavsiya etiladi.