2026-yildan boshlab O‘zbekiston tibbiyot oliygohlarida “Oliy hamshiralik ishi” yo‘nalishi joriy etiladi. Bu qaror sog‘liqni saqlash tizimini zamonaviylashtirish va xalqaro standartlarga mos kadrlar tayyorlash yo‘lidagi muhim bosqichdir.
Har bir tibbiyot universitetida bu yo‘nalish ochiladi, qabul kvotalari esa avvalgi yillarga nisbatan ikki baravar oshiriladi. 2027-yildan boshlab kvotalar yana kamida 20 foizga oshirib boriladi.
Bugungi kunda tibbiyot sohasida oliy ma’lumotli hamshiralar ulushi past. Yangi tizim orqali bu ko‘rsatkich 10 foizga yetkazilishi rejalashtirilmoqda. Bu esa hamshiralik kasbining ijtimoiy mavqeini oshiradi, bemorlarga ko‘rsatiladigan xizmat sifatini sezilarli darajada yaxshilaydi.
Kelgusi yildan boshlab oliy ma’lumotli hamshiralarga 100 foiz ustama to‘lanadi. Bu esa nafaqat ularning mehnatini qadrlash, balki yoshlarni hamshiralik yo‘nalishiga jalb qilishga xizmat qiladi.
Misol: agar hozirda o‘rta maxsus ma’lumotli hamshiraning maoshi 3 million so‘m bo‘lsa, oliy ma’lumotli mutaxassis uchun bu 6 million so‘mgacha yetadi.
Angliyaning mashhur “Pearson” kompaniyasi bilan hamkorlikda har bir viloyatda bittadan texnikumda xalqaro standartlarga mos hamshiralik dasturlari joriy etildi.
Kelajakda bu tashabbus doirasida:
-
Germaniya,
-
Shveytsariya,
-
AQSH kabi davlatlarning ta’lim dasturlari ham olib kiriladi.
Natijada, o‘quvchilar nafaqat kasbiy bilim, balki xorijiy tillar va xalqaro tibbiy amaliyot bo‘yicha ham tayyorlanadi.
Tibbiyot tizimi faqat shifokorlar emas, balki malakali hamshiralar orqali ham mustahkamlanadi. Yangi yo‘nalishlar yoshlar uchun barqaror ish, yuqori daromad va xalqaro imkoniyatlar eshigini ochadi.
