Oliy ta’lim muassasalariga kirish imtihonlarida maksimal 189 ball to‘plagan abituriyentlar davlat granti asosida talabalikka qabul qilinadi.

Mazkur tartib davlat OTMlari bakalavriatining kunduzgi ta’lim shakliga kirish imtihonlarida eng yuqori natijalarni qayd etgan yoshlar uchun joriy qilingan Prezident granti tizimi bilan bog‘liq.

2026/2027-o‘quv yili qabulida beshta fan bo‘yicha jami 90 ta test savoli berilib, to‘plash mumkin bo‘lgan eng yuqori natija 189 ball etib belgilangan.

Oddiy grant kvotasi yetmasa nima bo‘ladi?

Masalan, muayyan OTM va ta’lim yo‘nalishiga 50 ta davlat granti o‘rni ajratilgan bo‘lsin. Ushbu yo‘nalishni 100 nafar maksimal — 189 ball to‘plagan abituriyent tanlagan taqdirda, ular oddiy grant kvotasi doirasidagi 50 ta o‘rin bilangina cheklanib qolmaydi.

Prezidentning PQ–5172-son qaroriga muvofiq, davlat OTMlari bakalavriatining kunduzgi ta’lim shakliga kirish imtihonlarida respublika bo‘yicha eng yuqori ball olgan 200 nafar talabgor Prezident grantiga da’vogar sifatida aniqlanadi. Tegishli ta’lim sohasi bo‘yicha oxirgi o‘rindagi talabgor bilan teng ball olganlarning barchasi ham ro‘yxatga kiritiladi.

Prezident grantiga da’vogar deb topilgan abituriyentlar davlat granti asosida o‘qishga qabul qilinadi. Shu sababli bir yo‘nalishda maksimal ball olgan talabgorlar soni odatiy grant kvotasidan ko‘p bo‘lsa, ular uchun qo‘shimcha grant o‘rinlari yuzaga kelishi mumkin.

OTMda joy yetarli bo‘lmasa-chi?

Abituriyentning vazifasi belgilangan imtihonlarni topshirish, maksimal natijani qayd etish va tanlovlarini tegishli tartibda tasdiqlashdan iborat.

Talabalarni joylashtirish, qo‘shimcha guruhlar tashkil etish va ta’lim jarayonini yo‘lga qo‘yish masalalari OTM hamda vakolatli davlat tashkilotlari tomonidan hal qilinadi. Qabul parametrlaridan tashqari talabalarni o‘qishga qabul qilish Davlat komissiyasi tomonidan amalga oshirilishi mumkin.

Prezident grantiga da’vogar va sovrindor bir xilmi?

Yo‘q. Ushbu ikki tushunchani farqlash kerak.

Kirish imtihonlari natijasiga ko‘ra Prezident grantiga da’vogar bo‘lgan abituriyentlar birinchi kursga davlat granti asosida qabul qilinadi.

Prezident grantining yakuniy sovrindorlari esa birinchi kursni barcha fanlardan a’lo baholarga tamomlagan, ilmiy va ijtimoiy faollik ko‘rsatgan da’vogar talabalar orasidagi alohida tanlov orqali aniqlanadi.

Asosiy qoida: davlat OTM bakalavriatining kunduzgi ta’lim shakliga kirishda maksimal 189 ball to‘plagan talabgor oddiy grant kvotasi kam bo‘lgan taqdirda ham Prezident grantiga da’vogar sifatida davlat granti asosida qabul qilinishi mumkin.