Kechki ta’lim shaklida tahsil olayotgan talabalar orasida eng ko‘p beriladigan savollardan biri — yotoqxona bilan ta’minlanish tartibi. Bu borada Vazirlar Mahkamasining 2023-yil 14-avgustdagi 376-son qarorida aniq tartib belgilangan.
Avvalo, turar joyga joylashtirishda kunduzgi ta’lim talabalariga ustuvorlik beriladi. Ya’ni, ularning joylashtirish jarayoni to‘liq yakunlanmaguncha boshqa ta’lim shaklida o‘qiyotgan talabalarga yotoqxona berilmaydi.
Shu bilan birga, agar kunduzgi talabalar joylashtirilgach, bo‘sh joy qolsa, kechki ta’limda o‘qiyotgan talabalar ham turar joydan foydalanish huquqiga ega bo‘ladi. Bu esa ko‘pchilik uchun asosiy imkoniyat hisoblanadi.
Biroq ayrim talabalarga alohida ustuvorlik beriladi. Agar kechki ta’limda o‘qiyotgan talaba imtiyozli toifaga kirsa, unga yotoqxona masalasida navbatdan tashqari imkoniyat yaratiladi. Bunga “Mehribonlik uylari” tarbiyalanuvchilari, ota-ona qaramog‘idan mahrum bo‘lgan talabalar, “Ijtimoiy himoya yagona reyestri”, “Temir daftar”, “Ayollar daftari” yoki “Yoshlar daftari” ro‘yxatiga kiritilgan oilalar farzandlari, I va II guruh nogironligi bo‘lgan talabalar, bir oiladan bir nechta shartnoma asosida o‘qiyotgan talabalar, xalqaro va respublika miqyosidagi fan olimpiadalari hamda tanlovlarda g‘olib bo‘lgan talabalar, shuningdek, “Zakovat” respublika bosqichida muvaffaqiyatga erishgan talabalar kiradi. Shuningdek, talabalar turar joyida kengash raisi yoki qavat sardori bo‘lganlarga ham imtiyoz beriladi.
Demak, kechki ta’lim shaklida o‘qiyotgan talabalar uchun yotoqxona masalasi ikki asosiy holatga bog‘liq: kunduzgi talabalar joylashtirilgandan keyin bo‘sh joy qolsa yoki talaba belgilangan imtiyozli toifaga kirsa. Shu sababli, talabalar o‘z imkoniyatlarini va huquqlarini aniq bilib, yotoqxona uchun murojaat qilishda ushbu mezonlarga tayangan holda ish tutishlari lozim.
