2025-yilda respublika bo‘ylab jami 614 ming 768 nafar abituriyent test sinovlarida ishtirok etdi. Bu ko‘rsatkich o‘tgan yilga nisbatan 122 ming nafarga kam. Abituriyentlarning 253 ming 844 nafari (41,29%) testdan 56,7 balldan yuqori natija qayd eta olmadi. Bu esa maksimal ballning atigi 30 foizini tashkil etadi. Boshqacha aytganda, deyarli har 10 abituriyentdan 4 nafari minimal darajaga ham yetmadi.
O‘tgan yil bilan solishtirganda o‘zgarish
2025-yilgi natijalar 2024-yilga nisbatan 6 foizga yaxshilangani kuzatildi. Misol uchun, 2022-yilda 51,2 foiz abituriyent 56,7 balldan kam to‘plagan bo‘lsa, 2025-yilda bu ko‘rsatkich 41,29 foizgacha pasaydi. Bu umumiy jarayonda ijobiy dinamikani ko‘rsatmoqda.
Hududlar kesimidagi ko‘rsatkichlar
Eng yomon natija Andijon viloyatida qayd etilib, bu yerda abituriyentlarning 47,6 foizi 56,7 balldan yuqori ball to‘play olmadi. Eng yaxshi natija esa Buxoro viloyati va Toshkent shahrida kuzatildi — atigi 31,4 foiz abituriyent minimal ballni to‘play olmadi. Bu hududlar respublika bo‘yicha eng past salbiy ko‘rsatkichni qayd etdi.
Hududlar kesimidagi farqni ko‘rsatadigan jadvalda ayrim e’tiborga molik jihatlar kuzatiladi:
-
Sirdaryo viloyatida 43,7 foiz abituriyent 56,7 balldan kam to‘plagan, lekin bu ko‘rsatkich o‘tgan yilga nisbatan 8,1 foizga yaxshilangan.
-
Qoraqalpog‘iston Respublikasida ham sezilarli o‘sish qayd etilgan — natija 9 foizga yaxshilandi.
-
Navoiy viloyati 40,2 foizlik ko‘rsatkich bilan respublika o‘rtacha darajasidan yaxshiroq natija ko‘rsatdi.
Umuman olganda, 2025-yilda birorta ham hudud o‘tgan yilgi natijaga nisbatan yomonlashmadi. Barcha hududlarda ijobiy o‘sish kuzatildi.
Eng ko‘p yaxshilangan hududlar
O‘tgan yilga qaraganda natijasi eng ko‘p yaxshilangan beshta hudud:
-
Qoraqalpog‘iston Respublikasi (+9%)
-
Navoiy viloyati (+9%)
-
Sirdaryo viloyati (+8%)
-
Buxoro viloyati (+8%)
-
Qashqadaryo viloyati (+6%)
Bu hududlarda ta’lim sifatini oshirish, abituriyentlarni tayyorlash bo‘yicha chora-tadbirlar natija berganini ko‘rish mumkin.
2025-yilgi imtihon natijalari umumiy holda ijobiy tendensiyani ko‘rsatmoqda. Abituriyentlarning 41,29 foizi minimal darajaga ham yetmagan bo‘lsa-da, oxirgi uch yil ichida salbiy ko‘rsatkichlar 10 foizga qisqardi. Bu esa ta’lim tizimida bosqichma-bosqich ijobiy o‘zgarishlar yuz berayotganidan dalolat beradi.
Biroq, ayrim hududlarda hali ham yarimiga yaqin abituriyentlar minimal ballni to‘play olmaganini hisobga olib, hududiy ta’lim sifatini yanada oshirish, abituriyentlarni imtihonlarga tayyorlashda samarali metodlarni qo‘llash dolzarb bo‘lib qolmoqda. Shu bilan birga, Buxoro va Toshkent shahrining past salbiy ko‘rsatkichlari boshqa hududlar uchun o‘rnak sifatida xizmat qilishi mumkin.
